Gâteau du chef

طريقة التحضير

1. كناخدو إناء، و نديرو فيه البيض، 300 غرام سنيدة.  نضيفو 2 خنيشات سكر فاني اديال، و نطربوا بالطراب الكهربائي، حتى يبياض الخليط و يولي متجانس. من بعد، كنخويو الخميرة ف 300 غرام ديال الطحين، نخلطوهم و نغربلوهم فالشبكة، و نضيفوهم تدريجيا، و نبقاو نخلطو  بla spatule، حتى يتجمع الخليط ديالنا. من بعد، كناخدو القالب الدائري، و ندهنوه بالزبدة، و نزيدوا الطحين بهاد الطريقة، باش متلصقش la génoise أو الكعكة منين تكون كتطيب. و دابا، كناخدو papier aluminium، و نحطوه فوق الاطة، و نحطو فوق منو القالب، و باش ميتسربش لينا الخليط كنلفوه عليه بهاد الكيفية كيف كتشوفو، عاد كنخويو الخلطة، و نبداو من الوسط، و نكملو على الجناب، و نحطوه فالفران لمدة ساعة على حرارة 170 درجة. و منين تطيب، نخليوها ترتاح لمدة 15 دقيقة. أحسن طريقة باش نديرو الطحين فقالب دائري، هي نوقفوه، و ناخدوا الطحين بمعلقة، و نحطوه فيه، و نبقاو ندورو بهاد الشكل، حتى يلصق فالحاشية كلها. من بعد ما ارتاحت la génoise 15 دقيقة، كنحيدو ليها papier aluminium، و نحيدو ليها القالب، و نقطعوها على النص بهاد الطريقة، و نحيدو ليها الفوق باش يصبحوا عندنا 2 قطع. من بعد، نخليوهم يرتاحو لمدة 15 دقيقة.
2. كنخدوا كاصرونة، و نخويو فيها 200 غرام فريز، نزيدوا 75غرام سنيدة،  كأس صغير ديال الما، نشعلوا عليها، ونحركوا و نخليوها تغلى. واش عرفتي بلي بالإضافة للفوائد ديال تناول الفريز، هاد الفاكهة فيها القليل من السعرات الحرارية، و مزيانة للناس لي دايرين ريجيم! نخدوا كاصرونة أخرى، و نخويو200 غرام سنيدة، كأس صغير ديال الما، و 2 خنيشات سكر فاني اديال، و نحركوا بالطراب. و نخليوه يغلى. نرجعوا لكاصرونة ديال الكولي ديال الفريز، و نبقاو نحركوا. من بعد، كنضيفو سكر فاني اديال، مستحضر فلان فريز اديال، و نبقاو نحركوا. و منين كيتقال، و يولي حمر، نطفيو عليه. و منين يغلى السيرو، نطفيو عليه حتى هو. من بعد، كنخويو الكولي فغراف طويل ديال البلاستيك، و نطحنوه بالميكسور العمودي. و فالأخير، كنصفيو الكولي فالشبكة. من بعد، كنخليوه يرتاح فالثلاجة لمدة 15 دقيقة. كنخدوا إناء، و نخويو فيه مستحضر قشدة الفريز اديال، و نزيدوا 250 مل ديال الحليب بارد، و نطربوا بالطراب الكهربائي حتى تتجانس الكريمة و تعقاد.
3. و دابا، كنخدوا السيرو للي وجدنا، و نسقيو الطرف الأول ديال la génoise. من بعد، كنخويو عليه الكولي، و نسرحوه بشوية كيف كتشوفو، و نخليوه يرتاح 5 دقايق فالكونجيلاتور. من بعد مرتاح، كناخدو جيب حلواني، و نعمروه ب la mousse للي وجدنا، و نزيدوها من الفوق بشكل حلزوني، و نضيفوا50 غرام ديال الفريز مقطع طريفات صغار. و منين نساليو، نحطو فوق منو الطرف الثاني، و نسقيوه بالسيرو، و نزيدوا عليه عاود الكولي. نسرحوه، و نضيفو القشدة ديال الفريز من الفوق، و نزيدوا الجناب حتى هما بهاد الكيفية.  من بعد، نسرحوها من الفوق و من الجناب بهاد الطريقة، و ناخدوا القشدة للي شاطت فلإناء، و نستعملو هاد الآدات باش نحصلو على النتيجة للي بغينا. من بعد، كنحطوها فالكونجيلاتور لمدة ساعة و نصف.
4. باش نوجدو la pâte à sucre، كناخدو شوية ديال النشا mayfine، و ندردروه كيف كتلاحضو، عاد كناخدوا 800 غرام ديال العجينة ديال السكر، و ندلكوها مزيان بالمدلاك كيف كتشوفو، و نحرصوا باش نرققوها حتى تولي فيها 3 ملمتر ديال السمك أو الغلض. و دابا، كنغطيهم بها le gâteau بهاد الكيفية، و نحرصوا باش تشد فيه مزيان، و من بعد، كنقطعو للي شاط بالموس،  نكوروها،و نخليوها حتى نحتاجو ليها. من بعد، كنخدوا الآدات للي سرحنا بها الكريمة من قبل، و نملسو بيها la pâte à sucre باش تولي مقادة و رطبة. و الأن، نرجعوا la pâte à sucre للي شيطنا، و ندوروها بهاد الشكل. من بعد ما درنا les gants، (باش منوسخوش la pâte البيضة باللون ديال la pâte الحمرة)، كناخدو 200 غرام ديالla pâte à sucre الحمرة، و نسرحوها بالمدلاك بهاد الكيفية، و منين نساليو، نقطعو ليها الجنب، و نصايبو مستطيلات. ندردرو عليهم شوية ديال mayfine، و نلويوهم كيف كتشوفو بهاد الشكل. و دابا كنقطعو طريف من la pâte à sucre، و نسرحوها و نصايبو بيها 2 عويدات.
5. و دابا، جات المرحلة للي كتطلب منا شوية ديال التركيز. كناخدو le gâteau و نسردوه بشوية ديال الما و ناخدوا le ruban الحمر ديال la pâte à sucre، و ندوره عليه من التحت، و نتبتوه. من بعد، كناخدو ل ruban الثاني، و نشكلو بيه كيف كتشوفو ديال2 papillons les، نسردوهم حتى هوما، و ناخدو العويدات البيضين، و نصايبو بيهم العقدة. و دابا، كنرجعو لgâteau، ونلصقو فيه ل papillon بشوية ديال الما. من بعد، كناخدوا موس، و نزوقو بيه الجناب بهاد الشكل، بلا منفلحو la pâte. و فالأخير، كناخدوا جيب حلواني، و نقطعوه بهاد الشكل، و ناخدوا شوية ديال la pâte،  نحطوها فالوسط، نسدو عليها، نمعسوها مزيان، نلويوها، و نبداو نصايبوالبتلات ديال الوردة أوLes pétales، للي غادي نشكلو، و نحرصوا باش نبداو نشكلوابتلات صغار، عاد نشكلوا تدريجيا الكبار كيف كتلاحضو، باش نحصلو على وريدة جميلة. من بعد، كناخدو طرف آخر، ندلكوه، و نلويوه بهاد الشكل. و فالأخير، كنحطوا الوريدة من الفوق، و نزيدوا حداها الطريفات للي لوينا، و نكملو التزيين بشوية ديال العليق.

و بالصحة و الراحة.