طريقة التحضير
0/0 الخطوات المستعملة- 1- كنخدوا 4 ديال البيضات، و نخويوهم فإناء، نزيدوا كاس ديال سنيدة و نطربوا بالطراب الكهربائي، نضيفو سكر فاني اديال،و نبقاو نطربوا حتى تبياض و تجمع. من بعد، كنزيدو كاكاو اديال على الطحين، نخلطوهم، نغربلوهم فالشبكة، و نخويوهم تدريجيا فالخليط، و نطربوا حتى يتجانسالكل. من بعد، كناخدو لاطة، و نتبتو عليها papier de cuisson كيف كتشوفو، نخويو من فوقها الخليط، نسرحوه مزيان، و ندخلوه للفران يطيب لمدة 10 دقايق على حرارة 170 درجة، و نحرصوا باش ميفوتش هاد التوقيت فالطياب باش تبقى la Génoise رطبة.
- 2- كنخدوا كاصرونة، و نخويو فيها 250 مل ديال الحليب بارد،نزيدوا نص كاس ديال سنيدة، نشعلوا عليها، نحركوا، و نزيدوا سكر فاني اديال. و فنفس الوقت، كناخدو كاصرونة أخرى، و نخويو فيها كاس و نص ديال سنيدة، نزيدوا 2 خنيشات سكر فاني اديال، نخويو كأس صغير ديال الما، نشعلوا عليها و نحركوا. من بعد، كناخدو 2 معالق كبار من مستحضر كريمة الحلويات اديال فإناء، و نخويو فيه شوية ديال الحليب من الكاصرونة تدريجيا وحنا كنخلطو باش متكورش لينا الكريمة، ونرجعوا كولشي للكاصرونة، نحركوا مزيان، و منين تعقاد، نطفيو عليها. نرجعوا للسيرو، و نحركوا. و إلى بغينا نعطيو نكهة جديدة لla Bûche ديالنا، كنضيفو شوية ديال القهوة على حسب الذوق، و نحركوا مزيان حتى تذوب.
- 3- كنخدوا كاصرونة، و نخويو فيها بيض ديال 4 البيضات، سكر كلاصي، نحركوا، نشعلوا عليها، نعاودو نحركوا، و نهزوها من العافية مرة مرة باش ميترقش لينا بْيَضْ ديال البيض. و منين يولي الخليط متجانس، كنخويوه فإناء، و نطربوه بالطراب الكهربائي حتى يبياض و يولي عاقد. من بعد، كنزيدو الزبدة تدريجيا، و نبقاو نطربوا حتى تولي كريمة.
- 4- و دابا كنخدوا la crème pâtissière، ونميكسيوها باش متبقاش محببة. نخويوها على crémeux beurré le، نخلطو،نضيفو لpraliné، و نعاودو نخلطو مزيان حتى يتجانس الخليط. من بعد مطابت la génoise، كندردرو عليها سنيدة، نقلبوها، و نحيدو منها papier cuisson،و نديروه من لتحت. من بعد، كنسقيوها مزيان بالسيرو، و نحطو فوق منها الخليط للي وجدنا، و نسرحوها مزيان، و ندردرو عليها اللوز مهرمش و محمر، و يمكن لينا نعوضوه بشي فاكية من آختياركم. من بعد، كنبداو نلففوه كيف كتشوفو، و فنفس الوقت، نسقيوه بالسيرو
- استهلاك اللوز بصفة منتضمة كيقلل نسبة التعرض لأمراض القلب. استهلاك اللوز بصفة منتظمة يقلل نسبة التعرض لأمراض القلب. و دابا، كنلويو عليها papier cuisson، بهاد الطريقة نشدوا لpapier بيد، و ناخدو لاطة، و نزيرو بها la bûche كيف كتشوفو، باش متحلش و تبقى شادة الشكل للي بغينا. و من بعد، كنحطوها فالكونجيلاتور لمدة 30 دقيقة. من بعد ما جمدات la bûche، كنحيدو papier cuisson،ناخدو جيب حلواني، و نعمروه بالكريمة للي وجدنا. من بعد، كنقطعو طرف، و نحطوه من الفوق و نبداو نديرو عليها الكريمة، و نسرحوها عليها بهاد الطريقة، و ندوزو عليها بالفورشيطة باش تعطينا خطوط بحال ديال جدع الشجر. من بعد، كنقطعوها من الجناب باش تجي مقادة، و نحطوها فالثلاجة ترتاح لمدة 15 دقيقة.
- باش نصايبو la tuile ديال الشكلاط، غادي نحتاجو للسكر ديال الشكلاط ذايب. كناخدو جيب حلواني، نقطعوه بهاد الشكل، نحلوه، نحطو فوق منو الشكلاط ذايب، نسرحوه مزيان، و نسدوا عليه كيف كتشوفو،و نديوه للثلاجة يبرد لمدة 10 دقايق. و دابا، باش نصايبو les tuiles ديال السكر، كناخدو لاطة مع papier de cuisson، و نحطو فوق منها الكليكوز، نسرحوه مزيان، و ناخدو منو شوية، و نلصقو بيه القنات ديال papier مع لاطة باش ميطيرش من بعد ما دخلناه للفران يتحمر، لمدة 10 حتى ل 12 دقيقة على حرارة 175. و من بعد ما تحمرو، كنهرسوهم. و دابا، من بعد ما كرمو les tuiles ديال الشكلاط، كنحيدوهم من البلاستيك، و نهرسوهم حتى هوما.
- و فالتقديم، كنزينوها بle tuiles ديال السكر، و نضيفو عليهم les tuiles ديال الشكلاط، و نكملو باللوز معسل.
و بالصحة و الراحة
شاركي برأيك