طريقة التحضير
0/0 الخطوات المستعملة- نوجدو الخليط الأول، في كاسرونة، نخويو 3 كيسان ديال الحليب بارد، و5 المعالق ديال سكر سنيدة و نزيدو عليهم 3 معالق كبار ديال كريم باتيسيير شوكولا، نحركو مزيان و نشعلو عليها العافية و نستمرو في التحراك و نخليوها حتى تعقاد و نطفيو عليها، من بعد نخويوها في إناء ،نغطيوها ببالستيك غذائي ونخليوها في الثالجة حتى كتبرد مزيان و تشد راسها.
- نوجدو الخليط الثاني، في إناء، نخويو كريم شانتيي إديال و سكر ڤانيال إديال و نزيدو عليهم كاس ديال الحليب بارد و نطربو مزيان. ناخدوالكريم باتيسيير من بعد ما بردات و نعاودو نطربوها و نزيدوها على الكريم شانتيي تدريجيا و نستمروا في التطراب حتى نحصلو على كريمة متجانسة.
- نرشو الدقيق في طاولة العمل، نسرحو العجينة المورقة حتى تولي رقيقة و نقطعو الجوانب الزائدين و نوضعوها في لاطة الفران مغطية بورق الطبخ و نعاودو نغطيوها بورق الطبخ و نتقلوها بلاطة أخرى و ندخلوها للفران على درجة حرارة 180لمدة 25 دقيقة.
- في إناء، كانخلطو 2 معالق ديال الما مع كيس سكر ڤانيال إديال و نطربو مزيان و نزيدو السكر كلاصي، نحركو مزيان حتى يتعلك و نحصلو على كلاصاج.
- من بعد ما برد البيسكوي و قطعناه قطع متساوية ، نعمروها باستعمال الجيب الحلواني بطبقة من الكريم، نحطو الطبقة الثانية ديال البيسكوي ونعاودو نفس العملية و نعمرو الطبقة الثالثة بالكلاصاج و نزينو بخطوط من كولي الشكولا بشكل طولي، و باستعمال عودنزينو الوجه ديال الميلفوي
شاركي برأيك