كعكة الاجاص “crumble”

طريقة التحضير

1.  كناخدو إناء،  نديرو فيه200 غرام الزبدة، و نطربوا بالطراب الكهربائي. وحنا كنطربوا، نزيدوا تدريجيا 200 غرام سكر كلاصي. نضيفو2بيضات، خنيشة سكر فاني اديال، و نكملوا التطراب. و دابا، كناخدوا500 غرام طحين، و نغربلوه فإناء، عاد نزيدوه تدريجياعلى الخليط، و نبقاو نقلبو فيه كيف كتشوفو حتى ينشف. من بعد، نبداو نعجنوه بيدينا حتى تجمع la pâte و تولي متماسكة. وفالأخير، نغطيوها بالسيلوفان، و نخليوها ترتاح فالثلاجة لمدة 20 دقيقة. و دابا، كنحيدوا العجيبة من الإناء، ندردرو شوية ديال الطحين فالبلانشة، و نبداو نعجنوها بيدينا، و نسرحوها بالمدلاك، و نعاونو بشوية ديال الطحين،و نكملو التدلاك. و فالاخير، نلويوها على المدلاك، و ناخدو le moule،ندهنوه بشوية ديال الزيت ،و نزيدوا الطحين بهاد الطريقة باش ميلصقش،و نحطو فيه العجينة بهاد الكيفية، و نحرصوا باش نخشيوها مزيان فجناب le moule، و نقطعو العجينة للي خارجة بالموس، و نحطوا la pate ديالنا للكونجيلاتور ترتاح لمدة 10 دقايق.
2. و دابا، كنخدوا إناء،  نخويو فيه200 غرام الزبدة، و نطربوها بالطراب الكهربائي. نزيدوا 200 غرام سنيدة، و نطربوا. نزيدوا 2 بيضات، 2خنيشات سكر فاني اديال، 200 غرام بودرة اللوز، 80 غرام الطحين، و نطربوا كلشي. من بعد، نخلطوها بla spatule حتى تتجانسو نخليوها ترتاح  فالثلاجة لمدة 15 دقيقة.
3.  باش نوجدوا le crumble، كناخدوا إناء،  نخويو فيه 100 غرام الزبدة، و نطربوها بالطراب الكهربائي. نضيفو 130 غرام سكر كلاصي، 30 غرام بودرة اللوز، و خنيشة سكر فاني اديال، و نطربوا. نزيدوا 150 غرام الطحين، و نخلطو ب la spatule، و نكملو بيدينا باش يتجمع الخليطة. من بعد، كناخدو papier cuisson، و نحطو العجيبة الوسط،  نغطيوها و ندلكوها بالمدلاك من فوق papier cuisson، و نحطوها فلاطة، و ندخلوها ترتاح فالكونجيلاتور لمدة 15 دقيقة.
4.  كناخدوا مقلة، و نديرو فيها 50 غرام الزبدة، 50 غرام سنيدة، نحركوا، و نزيدوا البوعويد مقطع على 4 و نبقاو نحركوا، و نقلبوه باش يتعسل لينا من كاع الجوايه. واش عرفتي بلي البوعويد غني بالألياف. من بعد، كنضيفو القرفة ،و نبقاو نقلبو فيه حتى يعطينا النتيجة للي بغينا.
5.  من بعد ما ارتاحت la pâte sucrée، كنخرجوها من الكونجلاتور،ونثقبوها بالفورشيطة و دابا، كناخدو جيب حلواني، و نعمروه ب la pâte d’amende، و نعمرو le moule بشكل حلزوني، و حنا باديين من الجناب حتى نوصلو الوسط، و نعاودو طبقة أخرى، و نسرحوها مزيان كيف كتشوفو. من بعد، كنزيدو عليها البوعويد معسل بهاد الشكل. و دابا، كناخدو، طريفات ديال لcrumble ، و نديروهم من الفوق، و ندخلوه للفران يطيب 35 دقيقة على حرارة 175 درجة. من بعد مطاب و خلليناه يبرد 15 دقيقة تقريبا، غادي نزينوه بالسكر كلاصي، و إلى بغيناه يكون مركز غير فالجناب، كناخدو ورق مقوى مدور، و نحطوه فوق la tarte، و نبداو  ندردرو السكر فالحاشية حتى تبياض. و فالأخير، كنحيدوه، و ندردرو شوية فالوسط كيف كتشوفو.
6. و فالتقديم، كنضيفو 2 طريفات ديال البوعويد معسل، و نزينوا بوريقة ديال النعناع.

و بالصحة و الراحة.