1- Foie marinée: إلى بغينا نقشروا الثومة بسهولة كناخدو إناء عامر بالما و نخويو فيه الثومة ديالنا و نخليوها ترقد لمدة نصف ساعة على الأقل عاد نحيدو ليها القشرة .و دابا، يمكن لينا نبداو نوجدو فهاد الشهيوة، كناخدو مقلة، و نخويو فيها البصلة مقطعة، نزيدوا زيت الزيتون، و نشعلوا عليها، ناخدو الثومة، و نمعسوها عليهم، و نبداو نشحرو البصلة، من بعد كنضيفو 2 وريقات سيدنا موسى، نزيدوا الكبدة مقطعة، و نحركوا باش نقليوها . نزيدوا نص معلقة صغيرة سكنجبير، معلقة صغيرة تحميرة على حسب الذوق، بزارعلى حسب الرغبة معلقة صغيرة كمون، ربع معلقة صغيرة قرفة، معلقة صغيرة ملحة على حسب الذوق، نص ضامتي زعفران، نحركوا شوية و نزيدوا معلقة كبيرة ديال مطيشة ديال الحك، و نخلطوها مع البصلة، و الكبدة، نزيدوا فالعافية و نضيفو مطيشة محكوكة، و نحركوا عاود، و نزيدوا معلقة صغيرة سكنجبير طري محكوك و نزيدوا شوية ديال الما و نحركوا. من بعد، كنضيفو معلقة كبيرة ديال القزبر و المعدنوس مقطعين، نحركوا، و فالاخير، كنزيدو 3 ديال المعالق كبار زيتون، و الحامض مقطع، و نخلطو كلشي، من بعد ما طابت الكبدة المشرملة، كنحطوها فإناء.
2- Cervelle mouton: باش نوجدو الطباص ديالنا، كنخدوا مقلة، و نخويو فيها زيت الزيتون، و نشعلوا عليها. نزيدو الثومة من بعد ما معسناها، ونضيفو اللفت. نحركوا، و نزيدوا شوية ديال الما سخون، و نخليو اللفت يتشحرو و نزيدوعاود شوية ديال الما، و نغطيوه تقريبا 10 ديال الدقايق باش يطيب. و دابا، كنخويو شوية ديال المايفين فطبسيل، نقصوا العافية. من بعد، ناخدو المخيخات ديالنا، و نغطيوهم بالنشا، و نديروهم فالمقلة يطيبو. من بعد، كنبداو نقلبو اللفت و المخ باش ميتحرقوش لينا. و دابا، كنضيفو البصلة محكوكة، و نحركوها مع اللفت، نزيدوا نص معلقة ديال الهريسة على حسب الذوق، نخلطوه، و نزيدوا سكنجبير محكوك، نحركوا، و نزيدوا السالمية مقطعة،
واش عرفتي بلي السالمية غنية بفيتامين K و الحديد. و البزار و الملحة على حسب الرغبة ، و نعاود نحركوا من جهة اللفت، نزيدوا نص ضامتي زعفران، و نعاود نحركوا. و فالاخير، كنخدوا معلقة صغيرة ديال النشا مايفين، و نخلطوه مع عصير الليمون، و نخويوه فالمقلة، نحركوا شوية، و نطفيو عليها.
3- Rognons de mouton: إلى بغينا نستعملو الشومبينيون الطري، و لقينا اللون ديالو بدا كيتبدل، كنحيدو ليه القشرة بهاد الطريقة، عاد نقطعوه. أول حاجة، كنخدوا مقلة، و نخويو فيها شوية ديال زيت الزيتون،و نشعلوا عليها، نزيدوا الزبدة، و الثومة من بعد ما معسناها، نحركوا شوية، و نضيفو الشومبينيون الطري للي قطعنا، نقلبوهم شوية، و نزيدوا السكنجبير محكوك، و نحركوا. و دابا، كنضيفو الفولات مقطعين، و نبداو نشحرو فيهم، نزيدوا البزار على حسب الرغبة، نحركوا عاود، و نضيفو نص ضامتي دجاج، و منساوش نقلبوا الفولات مرة مرة، من بعد، نزيدو شوية ديال الما طايب، و نزيدوا معلقة ديال المايفين، نحركوا، نضيفو التبش، نحركوا، و فالاخير، كنضيفو القشدة الطرية، و نحركو شوية، و منين يطيبو، نطفيو عليها، و نخويوهم فإناء.
4- و فالتقديم، بالنسبة للمخ، كنحطو اللفت هو الأول، عاد نزيدوه، و نزينوا بشوية ديال الحامض مرقد. من بعد، كنقدمو معاهم الكبدة اامشرملة كيف كتشوفو، و الفولات حتى هوما.
و بالصحة و الراحة!
شاركي برأيك