طريقة التحضير
0/0 الخطوات المستعملة- ناخدو كوكوت، نديرو فيها البصلة و الدجاج و نزيدو السكنجبير، القرفة، الابزار، راس الحانوت، نفرتو ضامتي ديال السمن و ضامتي زعفران ، المعدنوس و الزيت و نخلطوا كلشي و نخليوهم يتقلاو شوية و نسدو عليها ونخليو الدجاج يطيب في الماء لي طلقات لينا البصلة على نار مهيلة لمدة 45 دقيقة و من بعد ما طاب الدجاج نعزلوه بوحدو و نخليوه جانبا حتى يبرد، و ملي بقات لينا غير الدغميرة ، نزيدوا عليها العسل و المعدنوس و نخليوها تنشف من الماء مزيان و نزيدو عليها 6 ديال
البيضات وحدة ورا وحدة بال ما نحبسوا من التحراك حتى تبان لينا الدغميرة تجمعات و نطفيو عليها.
كانحيدو العضام من الدجاج و كانفرتوه قطع صغيرة.
- في إناء نديرو اللوز لي سلقناه و فسخناه و هرمشناه رقيق و نزيدوا عليه سكر كلاصي و القرفة نخلطو و نزيدو ماء الزهر و نعاودو نخلطو .
- باش جميع البسيطلات يجيونا قياس واحد و مقادين نستعملو مول دائري أو أي إناء و نسرحو فيه ورقة البسطيلة، ندهنوها من الجوانب بالزبدة و الزيت، نفرشو طبقة ديال الدغميرة ، و طبقة ديال الدجاج و طبقة ديال خليط اللوز و نسدوا البسطيلة ديالنا و ناخدو طبسيل آخر ونفرشو فيه ورقة ثانية و ندهنوها حتى هي بالزبدة و الزيت و نحطو فوق منها البسطيلة لي طوينا و نسدو عليها باصفر بيضة و نعودوا نفس العملية حتى نكملوا البسيطلات كاملين، و نستفوهم في لاطة و ندخلوهم يطيبوا على درجة حرارة 180 لمدة 40 دقيقة.
- من بعد ما طابوا البسيطلات ديالنا ندهنوهم بالعسل ،نزينوهم باللوز إيفيلي محمر والقرفة
شاركي برأيك