طريقة التحضير

0/0 الخطوات المستعملة
  1. كنخدوا الكتف، و نشرحوه كيف كتشوفو باش تدخل ليه العطرية مزيان. نبداو بالكمون للي كنسرحوه من فوق اللحم بيدينا  بهاد الكيفية،و نعاودو نفس العملية مع البزار على حسب الرغبة، و نزيدو عليه الزعيترة من بعد ما حكيناها، و بنة الطياب للي كتعوض لينا الثومة،و  ضامتي غنمي للي غتنسم لينا الطياب. فالاخير، نخليوه يرتاح لمدة 15 دقيقة. و إلى بغينا اللحم يتجانس مع العطرية و يجينا لذيذ، نخليوه يرتاح فالثلاجة ليلة كاملة.
  2. غادي نشوفو أسهل طريقة باش نرقدوا الخضرة و تدوم لينا لمدة طويلة: كنخدوا حك ديال الزاج للي كيتسد، و نخويو فيه الخضيرة ديالنا. من بعد، كنزيدوا عليها الملحة، ونتبعوها الخل. من بعد،كنزيدو الما حتى يعمر الحك،  و نسدوه.
    و فالاخير، كنحركوه كيف كتشوفو، و نحتفضو به فالمطبخ.
  3.  كنخدوا برمة عامرة بالما طايب، و ناخدو الكتف، و نخشيوه فالكسكاس، نزيدو معاه خيزو، الشيفلور، اللوبية الخضرة، و فالاخير، شوية ديال القزبر و المعدنوس مقطعين. من بعد، نسدوا عليهم، و نشعلوا عليها، و نخليوهم يتبخرو على الأقل ساعة (على حسب عمر الخروف). 
  4. و منين يبدأ البخار يخرج، كنتقلوه كيف كتلاحضو بشي حاجة ثقيلة باش يتحبس لداخل و يطيب لينا الكتف. واش  عرفتي بلي اللوبية الخضرة غنية بالبوتاسيوم لي مفيد للجهاز العصبي.
  5. و من بعد مطاب كلشي، كنطفيو على البرمة، و نبداو نحطو الخضرة فطبسيل. من بعد، كنحطو الكتف ديالنا فلاطة من فوق papier cuisson ، و نحيدو من الكسكاس الخضرة للي شاطت، و نحطوها فالطبسيل حتى هي. و فالاخير، كنحطوا  الكتف لفران يتحمر لمدة 10 دقايق على حرارة 220 درجة
  6.  و الآن، كنقدموا الكتف مع الخضيرة للي بخرنا معاه، و نزينوا من فوق منهم بالقزبر و المعدنوس للي قطعنا.

و بالصحة و الراحة!