فلان باتيسيي

طريقة التحضير

1. في إناء نديرو الدقيق، رشيشة الملح، سكر ڤانيليا إديال، نحركو و نزيدو الزبدة و نرملو النواشف مع الزبدة بهاد الطريقة و نزيدو بيضة و نجمعو العجين بلا ماندلكوه! نجمعو غير بالأصابع حتى نحصلو على عجينة متماسكة و نغطيوها بفيلم غذائي و نخليوها ترتاح لمدة 30 دقيقة و كانصحوكم أ الحادكات نفرشو على سطح العمل قطعة من الفيلم الغدائي ، نحطو العجين و نغطيوه بقطعة ثانية باش مانحتاجوش أننا نرشو الدقيق في سطح العمل ونسرحو العجين ديالنا بالمدلك, نحيدو القطعة الأولى من الفيلم الغدائي و نلبسو العجين لمول أو إطار دائري (لي متوفر عندكم) و بهاد الطريقة نحيدو القطعة الثانية ديال الفيلم الغدائي و نزولو الفائض من العجين.
   
2. باش نوجدو الكريم باتيسيير، نكبو الحليب بارد في كاسرونة نزيدو عليه القشدة الطرية و السكر سنيدة و 3 المعالق كبار من مستحضر كريم باتيسيير إديال، نخلطو، و نشعلو عليها العافية و نستمرو في التحراك حتى تعقاد و نطفيو عليها.
   
3. و دابا نخويو الكريم باتيسيير لي وجدنا فوق لاباط و نزولو باستعمال الموس أو قطاعة البيتزا العجين الزائد، نخليو غير سنتيم واحد فوق من قياس الكريمة و ندخلوها للفران على درجة حرارة 170 و نخليوها تطيب لمدة 30 دقيقة.
   
4. ها هو الشكل النهائي ديال الفلان باتيسيي ديالنا من بعد ما طاب كايجي هااائل ! ملي تجربوھ غادي تحسو بھاد البنة لي دایزھا الكلام و بالصحة و الراحة !