طريقة التحضير
0/0 الخطوات المستعملة- كنخدوا إناء، و نخويو فيه الماركرين، و نزيدوا شوية ديال الملحة على حسب الرغبة، و سكر فاني اديال، نزيدوا سنيدة من بعد ما غربلناها. من بعد، كنخلطوهم بيدينا، نزيدوا الزيت، بيضة، و نكملو التخلاط. و دابا، كنزيدو 2 كيسان و نص ديال الطحين تدريجيا من بعد ما غربلناه، و نبقاو نخلطو حتى نحصلو على عجينة كيف كتشوفو و دابا، كنبداو نشكلو كويرات صغيرة ، و نحطوهم فالقالب العجيب. و منين نساليو، كنستعملو شوية ديال الما باش نسطحوهم بهاد الكيفية. من بعد، نحطوهم فالفران يطيبو لمدة 15 دقايق على حرارة 180 درجة. من بعد ما طابو، كنحيدوهم من القالب، و نحطوهم فالطبسيل
- كنخدوا كاصرونة مع شوية ديال الما، و نحطو عليها إناء، و نحرصوا باش ميوصلوش الما. من بعد، كنعمروه بالشكلاط الأبيض. و نزيدوا عليه معلقة صغيرة ديال الزيت باش يساعدو فالذوبان و يزيدو لمعان. من بعد، نبقاو نحركوا حتى يذوب مزيان، و نطفيو عليه.
- من بعد كنعاودو ناخدو القالب العجيب للي طيبنا فيه الحلوى ديالنا، و نخويو فيه الشكلاط للي ذوبنا، ثم كنرجعو فيه الحلوى، و نعاودو نفس العملية مع الحلوى للي بقات. و فالاخير، كندخلوها للثلاجة تجمع و يكرم الشكلاط لمدة 10 دقايق.
- و فالاخير، كنخرجو الحليوات ديال الشكلاط ديالنا من le moule، و نزيدو فوق منهم confiture ديال الفريز و نقدموهم.
- وش عرفتي بلي بالإضافة لفيتامين C، الفريز غني بالفيتامين B9. إلى بغيتو تحلو شي قرعة جديدة ديال confiture مثلا، و جاتكم قاصحة، ضربوها من التحت، عاد حلوها.
و بالصحة و الراحة
شاركي برأيك